Roman Labiak: "KWYRLOK"

Gupie chopy!

 

Gupie chopy!
 
Fest sie Paulek roz upiyroł
Że niy bydzie, sie już spiyroł
Ze spiyrania, nic niy przidzie
Łōn mo prawie i tak bydzie
 
Paulek, przeca łoczytany
I we wszystkim, łoblotany
A kto inksze, zdanie mo
To mu Paulek, szkoła do
 
Jego baba sie niy wadzi
Chocioż pysk mo i poradzi
Mo dlo niego fajne słowo
I robota - mu zadowo
 
Moj Paulusiu, to sie wiy
Niy poradza tak jak ty:
 
“Pokoż jak sie piere pranie
Fajne robi sie śniodanie
Łobiod warzi i bigluje
Sprzōnto chałpa i kupuje”
 
Paulek tym uradowany
Tyro ciyngym niy wyspany
W szwōngu loto i haruje
Jak sie robi - pokazuje.
 
Bo som take automaty
Niy dostaniesz jich na raty
Szyjōm, pierōm i biglujōm
Łobiod zrobiōm niy pyskujōm
Dowo pozōr rod na dzieci
Na zakupy – zowdy leci.
 
Kiej chcesz wiedzieć, co to jest?
Wyćwicz chopa - ale fest!
 
Autor : Roman Labiak.