Roman Labiak: "KWYRLOK"

Ło Eciku

 

Kiej żech Ecika, spotykoł w Chorzowie
Staro ziokera, nosiōł na gowie
Szaket za mały, za krōtke rynkowy
A to niy jego, yno Antka z Dōmbrowy
Galoty sztrajfki, łozdarte w kroku
Kere, to erbnōł, po Zefku Ptoku
Śnuptychla w kabzi, nigdy niy prano
Łod wiyrchu do spodka, blank łosmarkano
Szczewiki za małe,
beztōż lezie krziwo
Tyro bez ulica, kożdy mu sie dziwo
Zygarek na gracy, mo namalowany
Kiej na niego wejrzi, czas mu jest niyznany
W kożdym siedzioł szynku, łod rana samego
Popijoł sie piwo - ale niy za jego.

Autor : Roman Labiak